തിരുവനന്തപുരം: അടുത്ത അധ്യയന വർഷത്തെ സ്കൂൾ പാഠ പുസ്തകങ്ങളുടെ സംസ്ഥാനതല വിതരണോദ്ഘാടനം നാളെ തിരുവനന്തപുരത്ത്. വിദ്യാഭ്യാസ മന്ത്രി വി ശിവൻകുട്ടി ഉദ്ഘാടനം ചെയ്യും. തിരുവനന്തപുരം ഗവൺമെന്റ് ഗേൾസ് ഹയർ സെക്കൻഡറി സ്കൂൾ കോട്ടൺ ഹില്ലിൽ രാവിലെ 11 മണിക്കാണ് ഉദ്ഘാടനം.
അധ്യയന വർഷം ആരംഭിക്കുന്നതിനു മുൻപ് തന്നെ അവധിക്കാലത്ത് കുട്ടികൾക്ക് അടുത്ത ക്ലാസിലെ പാഠ ഭാഗങ്ങൾ പരിചപ്പെടുത്തുന്നതിനു വേണ്ടിയും പത്താം ക്ലാസിലേക്ക് പ്രവേശിക്കുന്ന കുട്ടികൾക്ക് തയ്യാറെടുപ്പ് നടത്തുന്നതിനു വേണ്ടിയുമാണ് പുസ്തക വിതരം നേരത്തെ ആക്കിയത്.
2,4,6,8,10 ക്ലാസുകളിലേക്കുള്ള പാഠ പുസ്തകങ്ങളുടെ വിതരണമാണ് ആദ്യം. ഈ ക്ലാസുകളിൽ പഴയ പുസ്തകങ്ങൾ തന്നെയാണ്. അടുത്ത അധ്യായന വർഷം മുതൽ മാറ്റം വരുന്നതിനാൽ 1,3,5,7,9 ക്ലാസുകളിലേക്കുള്ള പുസ്തകങ്ങളുടെ വിതരണം മെയ് ആദ്യം നടത്താനുള്ള നടപടികൾ പുരോഗമിക്കുന്നു.
പാഠ്യ പദ്ധതി പരിഷ്കരണത്തിന്റെ ഭാഗമായി തയ്യാറാക്കിയ പുതിയ പുസ്തകങ്ങൾക്ക് സംസ്ഥാന സ്കൂൾ കരിക്കുലം സ്റ്റിയറിങ് കമ്മിറ്റി അംഗീകാരം നൽകിയിരുന്നു. പുതിയ പാഠ പുസ്തകങ്ങളിൽ ഭരണഘടനയുടെ ആമുഖം ചേർത്തതടക്കം നിരവധി പ്രത്യേകതയുണ്ട്.
